請選擇 進入手機版 | 繼續訪問電腦版

Leslieworld 哥迷世界

 找回密碼
 立即註冊_Register Now
搜索
查看: 2393|回復: 0

2002年3月24日 太陽報報導 張國榮浮世人生路 [複製鏈接]

Rank: 9Rank: 9Rank: 9

發表於 2013-3-24 02:21:30 |顯示全部樓層
張國榮浮世人生路『我有人群恐懼症』
        
同張國榮坐低傾偈的機會不多,不過大家絕對不陌生,只要哥哥想同你傾,短短的個半小時一定意猶未盡。今日同哥哥講過現時他的人生觀,也談過他的心願,在演藝界已經上岸的他,他的名字就彷彿與瀟灑、灑脫畫上等號。

演藝篇 ~ 我真係無壓力
張國榮的演藝事業用已經上岸來形容並不過分,演戲對他來說是一種追求、一種樂趣。 他說: 『依家拍乜野戲,我都只係有一個目標,就係做好片中的角色。其他的東西我唔會考慮咁多,好似票房收入咁,我真係無壓力,今日的張國榮拍過的電影,收過四千萬又有,慘到收二百萬都有,但係我勝在有埠,所以收唔收得並唔會影響到老闆找我。』

其實張國榮不愛搞電影宣傳,不過今日為了電影《異度空間》,哥哥在宣傳方面好落力,從未演過驚慄片,又要帶住一個新人的哥哥,有否真正感到壓力呢?『接呢部《異度空間》驚慄片,以前都未演過呢類角色,所以覺得好大挑戰,不過我對爾冬陞同導演好有信心,之前我地都合作過,大家好有默契,而且我演戲咁多年,有乜野戲難到我。呢部戲有好多內心戲,而且情緒變化好大,有場戲講我突然發現了一個大秘密,我要由驚訝轉入慢慢流淚,然後嚎哭,但這段戲完全無對白,我希望可以帶到戲入面呢個訊息畀觀眾。』

『講到點解咁落力幫手宣傳,張國榮真係無壓力的,但係開部戲的星晧,我好欣賞佢地對電影的遠見,唔會一窩蜂去拍笑片,而去搞另類電影,證明佢地的誠意,希望佢地好快摸中觀眾另類的喜好,拍到叫好又叫座的電影。』哥哥說。哥哥補充他演過不同類型的角色,如果要他挑選一個角色來演,他會選擇演一個患絕症病人,好像韓片《八月照相館》那類,其實現時哥哥揀戲拍,首要是選擇該部電影給觀眾帶來甚麼訊息,不會再接搞笑片類型。他強調說:『笑片並唔係唔好,但依家的我係希望拍到的言中有物的電影。』

獎項篇~ 我唔會嫌多
星皓開拍的電影正如哥哥所講的確好有誠意,《慌心假期》與《男人四十》分別在不同的電影頒獎禮,都有多項提名,這點足證他們的電影絕對被認同,只是票房差強人意。哥哥會否擔心《異度空間》又是同一命運,首次演驚慄片,他演那類角色會否被讚賞呢? 哥哥拿起咖啡深深喝了一口,說: 『獎項對我來講有當然好,無亦唔會影響我,好似影帝咁,好多年前我已經拿過,我演的《霸王別姬》在康城贏過『金棕櫚獎』。至於《春光乍洩》,當時我無期畀王家衛,所以戲分少過梁朝偉,否則呢個康城影帝都未知落在邊個手上。
不過獎項有邊個會嫌多,如果畀獎我,我一定會去拿。而且會著晒禮服去,唔會扮到唔志在咁,隨便著條牛仔褲出席。』『出席得頒獎禮個個都想得獎,一定無唔志在呢回事。近年在日本,韓國同其他地方我都有好多獎,我都唔會嫌多!呢個對我來講係認同。』

社交篇 ~ 我好低調
張國榮在娛樂圈二十年,圈中朋友自然不少,但甚少見到哥哥出席別人的首映或派對,似乎過分低調。哥哥說:『唔講你都唔知,其實我係有人群恐懼症,所以我好怕去人多的地方,但又唔係話唔想出席呢類畀面派對,好似去別人的首映,真係人頭湧湧,去到搶了主人家鏡又唔好,又擔心自己去到無人理,咁又好無癮,所以我成日擔心埋這些野,攪到自己唔會參加這些Party。自己的首映就唔同,因為自己一定係主角唔怕搶人地鏡,而出席的人,都係鍾意自己的,自然唔使擔心。』

生活篇 ~ 我唔可以肥
中年發福的例子在娛樂圈多不勝數,以張國榮四十多歲而言,能保持現時的體態,不禁令人羡慕。哥哥到現在都保持每星期打兩次羽毛球,便是他Keep Fit 的秘訣。當然,平時哥哥還會在家中玩健身,靚靚的豬腩肉絕對與他無關。哥哥說:『每個星期我都會同班波友打兩日羽毛球,如是者打了好多年,有一班係玩玩吓,咪陪佢地玩嚇囉!不過正式打那班人,我地個個都係校隊成員。我認為一個專業的演員,在演出的時候,一定要保持最靚、最Fit,觀眾係想睇到你的樣而來,如果唔能夠Keep住,搞到肥肉走晒出來,咁就好唔專業,呢個我一定唔會做,除非係劇情需要,導演要你肥咁就唔同。』

完結篇 ~ 實踐終生學習
為了電影宣傳,電影公司安排了幾間傳媒做訪問,在《太陽報》之前是一份英文報章,哥哥在訪問時英語對答相當流利,忍不住讚哥哥。 他表示在英國生活了七年,大學一年級爸爸有病才回港,所以練得一口流利英語。 他說:『我的普通話仲好啦,拍《霸王別姬》那時留在北京半年,又練得流利的普通話,我有請老師學,唔係玩玩吓。其實我成日都同身邊的演員講,一定要學好英文同普通話,因為中國入世之後,電影都可能會開放市場,到時機會多的是,英文同普通話唔掂好蝕底。』最後問哥哥希望學習哪個國家的語言,他選擇法文,理由是因法國這個地方實在靚,這是不折不扣的張國榮。

太陽報 (24/3/2002)         
test004.jpg
test001.jpg
test.jpg

Archiver|Leslieworld 哥迷世界

GMT+8, 2020-7-11 08:54 , Processed in 0.117962 second(s), 13 queries .

Powered by Discuz! X2

© 2001-2011 Comsenz Inc.

回頂部 3